malawus

keni, malawus ka anak, dasnan mu kung sasagakgak,
datang mang mayli o kikyak, ing pusu ku 'neng kabuklat,
makasagana ku gamat, keni, malawus kang sukat,
panayan da kang misapwak keti king masalasang labwad

minye tulang sari nyaman kekeng 'ma mung managimpan
ing panyatang mu bunsung mal, mal kang kalam nitang Malam,
ibat king Talapaglalang kadwang ukdung kaligayan
king bye mi ning kekang inang, pakibat king kayadwanan

nung yang kaburyan ning Banwa, malawus naku't paynawa,
potang mayna naku't matwa, potang matbud na'yng inawa,
malawus naku at muna, ing minye bye nung utus na
masakit man, tanggapan ta, muna nakung mako keka.

gumaga ka man e ka manangis

sumukal ka kaya pusu, / muran kayang e mu nanu?
nung mamun ku keti yatu / o mako ka male tau?
king sari pait a biru / ...potang king awun takbang ku?
kumaskup ka kaya salu / ban bye ing katimawan mu?

ing lumbe e sa' babakas, / ing legwan mu ing manyilad,
kakutud ning kakung oras / potang kaybat kung miyatad
ding kristal kalinong perlas, / brilyanti king gulut ulap
e tutulutang kukuldas / e mo pamalag king labwad

bugnus mo tabun ding mata / ing lumbe palbug mung serya,
ing tula ing salbabida / king alaalang sagiwa,
king sukal lub ampong dusa / anting maintang king sapa
e pabustang malumud ka / kawen mu ing dagus ning lwa.

ding poeta

ring guinu ra ring pluma / potang mamun no inawa
maralas ing kabilyan da / maluka la mu pamilya,
potang muli no king banwa / ilang alus talarima
medyu maypis la mu bulsa, / gagambul la mang kultura.

maralas lang e bubulad, / ing diwa ra libad-libad
neng manungi lang bersadas / -ding rima lalako ro lyap,
makibulsa lang mayayat / matenakan la mang watas
king apalsintan rang dapat, / ing meging bye e malwalas.

kasubli ning bye rang indam, / maglakwan lang pimamanan,
maging Herederu ta ngan / kalako ra king ketawan,
karing telatag dang lelang / bilang ambag king balayan,
para king amanung sisuan, / rimang alang kamatayan.

ing laurel

ding makipusung limputan kalupa ding manaliguat,
pamamandi ing gelingan king dapat ning tune watas,
king buntuk nung miputungan, king dyademang mitmung sampat,
makudta lang kapintasan, ilang e karapat-dapat,

king tune rang pangatau, -karing mapamangsang tau,
suksuk ning pamaninsultu itang dapat iputung mu;
ing bage a ustung-ustu iyampang mung peka-premyu,
nung magin lang laureadu, koronang baging mabulu,

-ing laurel buntuk ning watas, -laurel nang marangal niti,
king lugud na king pigagap dugpang anting patipati,
dalise ya’t misna sampat king poetang tune sugi
sukad ya’t lapat a lapat galal ya a matas dili

"ing mamuyat a magpatudtud"

ing magkulubut 'gyang gawan, / e mipayaglit bagya man,
ing tundu e naku ayan, / magtambun ku man ulunan
king malambut kung pagkeran, / biling-biling, pakirakpan,
nandin ku pa kukumbiran / paninap a miduruyan

ikang lulub king pamisip, / ing larawan mu sisilip,
kambe ning metung a dalit / a babagayan ning tigtig
king diwa ikang kakalbit / anti mong mangising pilit
panabwangan mu ing aglit / ban ing tundu e misingit

misapwak ne ing alaya / ginulis no retang yata
king makayatyat a banwa / mamaniman no ring biga
-rugo, makakera ku pa / anti kung merimlang taba
uling paninapan daka / at maglakbe ku pa diwa

e mu ne kukunan ing kakung papakwa

mal ya gamat ing anak ku, / ...mabayat ka adwan kaku...
katimbang ne pusu'y 'ma mu / ing bugtung a dalaga ku,
bilang pamayad mu kaku / -ban panusignan da kayu,
kunan me keta kekayu, / dala me pusu'y indu mu
-
nanu ing kanakung gawan? / king adwan ning kekang tatang
tuki ra kang sapilitan, / ikang ing kakung kaylangan,
ing salu mu'yng gawan tagnan / potang pagpa ke ing palang
king salu ning kakung inang / ing salu mu'yng pitabakan
-
ing mikakasbung tata na / ana sikan memulyo ya
(ngana) jito, patugut ka! / e tuki'yng kakung dalaga,
sige, e mu ne darala, / e muna gagawan ita,
uling akung tabak keka / patluran da ka inawa